राजीनामा जिन्दगी

जिन्दगीको राजमार्गमा
जेब्राक्रसिङ हुँदै
बोकेर  हिँडेको थिएँ
एउटा राजीनामा पत्र ।

 एस्ट्रेमा फ्याँकिएको
 सिग्रेटको ठुटा जस्तै
 फालेर आएको पनि थिएँ 
 मैले उसको नियुक्ति पत्र
 पत्रसँगै मेरो  जिन्दगी ।

प्रेमाभिलाषीहरुसँग लिप्त
नवयौवना जसरी
बन्नै सक्दिनँ एक पतिपरायण
हुनै  सक्दिनँ म तिम्रो प्रिय
म आफ्नै चिहानमा
आस्थाको  मखमली फूल फुलाउने मान्छे 
तिम्रो ओठको सिग्रेट बनेर
पटक  पटक सल्किनु छैन मलाई
र फालिनु छैन कर्कश आवाज बनेर
मृत खरानी जस्तै
तिम्रो हृदयको एस्ट्रेमा ।


मेरा लागि
जीवन मृत्यु बनेको बेला
मृत्यु नै  अग्नि परीक्षा बनिदियो
थाहा थियो,
तिमीले एक दिन
गुनको बदलामा
बैगुन घोलेर विषकै प्याला  पिलाउँछौ
कुरी बस्ने छौ साँघुरो घाट ।

बुझेरै तिम्रो डबल स्टान्डर
जसरी तिमीले नमाग्दै दिएँ
मैले राजीनामा जिन्दगी
तिमीले पनि दिनुपर्छ त्यसै गरी
र चुसिनुपर्छ
एक न एक दिन
त्यही  आर्यघाटमा
जसरी समयले चुसेको छ
मान्छेको सिग्रेट ।